"رغيف صخن" مدوّنة عن الإكتئاب هدفها توعّي مجتمعنا على الأذى يلّلي بسبّبه للناس يلّلي عندهم هالحالة النفسيّة.
أنا صرلي 7 سنين بعاني من الإكتئاب وبعرف إنّو أصعب شي الوحدة تفسّر للناس بشو عم تقطع. مجتمعنا بيعتبر إنّو الإكتئاب مش مرض ولا حتّى حالة نفسيّة جدّيّة، إنّما نوع من الغنج. إنّما الدراسات بتبرهن إنّو الإكتئاب (وغيرها من الأمراض النفسيّة) نوع من الإرتباك النفسي أسبابه عديدة: بيولوجيّة، شخصيّة، وإجتماعيّة. والإكتئاب ع مدّة طويلة ممكن يغيّر تكوين الدماغ ويصعّب العلاج كتير (بس في أمل!).
صفحات المدوّنة نابذة عن تجربة شخصيّة ما بتشمل كلّ صعوبات الإكتئاب وما بتدّعي أي مقاربة علميّة للموضوع. أنا مش أخصّائيّة علم نفس ولا آخذة أي صف علم نفس بحياتي. إنّما قارية كتير عن الموضوع لإفهم حالي أحسن وإقدر واجه هالمرض بشجاعة أكتر.
