#5

#4

مرّات بفكّر إنّو يمكن المرض الجسدي أهين. الكلّ بشوفو والكلّ بيفهمو. ما حدا بعيّط ع حدا لأنّو كسر إجرو مثلاً.

#3

ما فينا ننكر إنّو عالم علم النفس بكلّ وظايفه وأدويته مربح كتير...

شركات الدواء أكيد بيهمّا تعمل طنّة ورنّة من الأمراض لتستفيد إقتصاديّاً. وأطبّاء النفس والمعالجين النفسيين الباقيين كلّهم بينتفعوا إذا نحنا مرضنا أو إذا قنعونا إنّو نحنا مرضى...

وأكيد في معالجين ما بهمّهم إلّا الربح. ويمكن في أطبّاء بسافروا ع حساب شركات أدوية مقابل وصفة أدويتهم. الرشوة مش بعيدة أبداً وضروري ننتبه لكل هالأشيا ونختار الأطبّاء بوعي وحذر.

بس ما فينا نقول إنّو الأمراض النفسيّة مش موجودة فعليّاً و إنّو كلّ هيدا إختراع إمبريالي! في دراسات كتير (غير مموّلة من شركات الأدوية أو أي شخص إلو مصلحة إقتصاديّة بالموضوع) بتبرهن إنّو الأمراض النفسيّة حقيقيّة. 

#2

مرّات كتير ما بيجي عبالي قوم من التخت... كلنا هيك. بس الفرق إنّو أنا بتصير معي كتير (كتير كتير!) وكتير صعبة قول لحالي "يلّلا نهار وبيمرق" لأنّو بعرف إنّو النهار لي بعدو بعد أصعب. وما بقدر إتخايل أي شي منيح وحلو معقول يصير. بركّز بس ع الأشيا البشعة، القاسية، الصعبة.

وأضرب شي بالموضوع إنّو كتير صعب ناخد فرصة من الشغل... وإذا قدرنا ناخد فرصة، بيحسبوها فرصة! ما بيعترفوا إنّو الإكتئاب مرض... أصلاً ليش بدّي قلّهم إنّي مكتئبة؟ إذا عرفوا بعلق بلسانن!

#1

مجتمعنا قاسي كتير. بلا ما يعرف، بيقدر يدفع شخص ع الأذى النفسي. يمكن هو مش قاصد يئذي... بس ما بهم شو المقصود. بالنهاية الرسالة يلّلي بتوصل هي إنّو في شي غلط فيي. وكتير هيّن إنّو شخص مكتئب يصدّق هيدا الشي.

بس الحقيقة هي إنّو مش ضروري الوحدة تكون عم تقهقه كل النهار حتّى تفرجي إنّو مبسوطة. ومش ضروري تكون مبسوطة أصلاً...

بس الإكتئاب ما بيعني أبداَ إنّو كلّ يوم في بكي أو زعل. مرّات بيقطع إيّام كتير حلوة... ما تنزعولي ياها!