شكيبة المش كئيبة بتزعل شوي، بتنبسط شوي، وأغلب الأوقات لا زعلانة ولا مبسوطة... يعني متلا متل الكلّ. بسّ صرلنا زمان ما شفناها.
العفريت هو الخبيث المُنكَر. يلّي بشوفوه قلال ويلّي بيعرفوه بعد أقلّ. بوزّع شرايط حمر كيف ما كان. ما حدا بيعرف ليش بيختار الناس يلّي بيختارهم. يمكن بحبّ طبعهم أو أفكارهم أو ظروفهم أو تكوينهم البيولوجي.
شكيبة الكئيبة بتقضّي وقتها عم تجرّب تتخلّص من الشريطة الحمرا. شافت أخصّائيّين كتير وأخدت أدوية كتير وبعدها الشريطة محلّها. مرّات بيقطع أشهر ما بتأثّر الشريطة ع حياتها. بسّ أغلب الأوقات الشريطة بتفرض وجودها.
نرجس هي المغرورة اللّي بتعمل حالها متواضعة. ما حدا بالدنيا أذكى منها وما حدا بيتصرّف "متل ما لازم" غيرها. أحلى ما عندها تفرجيك وين غلطت. وإذا هي غلطت، ما تحلم تسمع إعتذار.
البطريرك (بالمعنى الإجتماعي، مش الديني) هو رمز النظام الأبوي الّلي حاكم عالمنا. الرجّال المتسلّط اللّي بيعتبر حالو أقوى وأحسن وأذكى من غيرو بس لأنّو رجّال. البطريرك بحبّ التقاليد كتير بس مفكّر حالو عصري و"متحضّر."
